ಗಾವೋ ವಿಶ್ವಸ್ಯ ಮಾತರಃ

   

    ಗಾವೋ ವಿಶ್ವಸ್ಯ ಮಾತರಃ ಎಂದರೆ ಈ ಜಗತ್ತಿಗೆ ಗೋವು ತಾಯಿ ಇದ್ದಂತೆ. ಸರಳ, ಮೂಕ ಮತ್ತು ಉಪಯುಕ್ತ ವಾದ ಜೀವಿ. ನಾವು ಎಷ್ಟು ಪ್ರೀತಿ ತೋರಿಸ್ತಿವೋ ಅದಕ್ಕೆ ಮೀರಿದ ಪ್ರೀತಿ ನಮಗೆ  ಕೊಡುತ್ತದೆ. ಅದರ ಹಾಲು ಎಷ್ಟು ಪ್ರಯೋಜನಕಾರಿ ಎಂದರೆ ಅದಿಲ್ಲದೆ ನಮ್ಮ ದಿನನಿತ್ಯ ಆಹಾರ ಪದ್ಧತಿ ಸಂಪೂರ್ಣವಾಗುವುದಿಲ್ಲ.

  ನಾವು ತಿನ್ನುವ ಎಷ್ಟೋ ಸಿಹಿ ಪದಾರ್ಥಗಳು ಹಾಲಿಲ್ಲದೆ ತಯಾರಾಗುವುದಿಲ್ಲ.
ಆದರೆ ಈ ಹಾಲನ್ನು ಉತ್ಪಾದನೆ ಮಾಡುವ ಡೈರಿ ಫಾರ್ಮ ಗಳ ಸಂಕಷ್ಟ ಯಾರಿಗೂ ತಿಳಿದಿಲ್ಲ . ಅವರಿಗೆ ಆಗುವ ನಷ್ಟ ಅಷ್ಟಿಷ್ಟಲ್ಲ. ಇದರಲ್ಲಿ ಕಲಬರಿಕೆ ಮಾಡದೆ ಇದ್ದರೆ ಅವರಿಗೂ ಉಳಿಗಾಲವಿಲ್ಲ. ಅಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ.

      ಮೊನ್ನೆ ತಾನೆ ಸಾಗರದ ಸಮೀಪದಲ್ಲಿರುವ ಒಂದು ಡೈರಿ ಫಾರ್ಮ್ ಗೆ ಭೇಟಿ ನೀಡಿದೆ. ಅಲ್ಲಿ ಅವರು ಎದುರಿಸುವ ಸವಾಲುಗಳನ್ನು ಬಿಚ್ಚಿಟ್ಟರು. ಅಲ್ಲಿ ಅಂದಾಜು 300 ದನಗಳು ಇದ್ದವು. ಸುಮಾರಷ್ಟು ಹೈಬ್ರಿಡ್ ತಳಿಗಳು. ಉಳಿದವು ಮಲ್ನಾಡ್ ಗಿಡ್ಡ. ಅವರಿಗೆ ಅಂದಾಜು 600 ಲೀಟರ್ ಹಾಲು ಉತ್ಪಾದನೆ ಆಗುತ್ತದೆ. ದಿನಕ್ಕೆ ಒಂದು ದನದ ಮೇಲೆ ಅವರಿಗೆ 200 ರೂಪಾಯಿಗಳನ್ನು ವ್ಯಯಿಸಬೇಕಾಗುತ್ತದೆ. 300 ದನಕ್ಕೆ  ಅಂದಾಜು 60,000 ರೂಪಾಯಿಗಳು. ಪ್ರತಿ ಲೀಟರ್ ಗು ಅಬ್ಬಬ್ಬಾ ಅಂದರೆ 40 ರೂಪಾಯಿಗಳು ಎಂದು ಭಾವಿಸೋಣ. ಹಂಗಾದ್ರೆ ಅವರಿಗೆ ಬರೋದು  24000 ರೂಪಾಯಿಗಳು. ಇಲ್ಲೇ ಅವರಿಗೆ ಎಷ್ಟು ನಷ್ಟ ಆಗ್ತಿದೆ ಅಂತ ತಿಳಿಯಬಹುದು.

     ನಾವು ಹಾಲಿನ ದರ ಜಾಸ್ತಿ ಆಯಿತು ಅಂತ ಗೊತ್ತಾದ್ರೆ ಬಾಯಿ ಬಾಯ್ ಬಡ್ಕೋತೀವಿ. ಆದರೆ ಅವರಿಗೆ ಆಗುವ ನಷ್ಟ ಕೇಳುವರು ಯಾರು...?? ಹಸು ಹಾಲೇ ಬೇಕು ಎನ್ನುವರು ಕನಿಷ್ಠ ಪಕ್ಷ ಲೀಟರ್ ಗೆ 60 ರೂಪಾಯಿಗಳನ್ನು ಕೊಟ್ಟರೆ ಅವರಿಗೂ ತೃಪ್ತಿ.
ಇದಕ್ಕಾಗಿಯೇ ನಂದಿನಿ ಹಾಲಿನಲ್ಲೂ ಎಲ್ಲ ತರಹದ ಹಾಲು ಮಿಶ್ರಿತವಾಗಿರುತ್ತದೆ. ನಾವು ಅದನ್ನು ಹಸು ಹಾಲು ಎಂದು ಭಾವಿಸಿ ಕುಡಿಯಬೇಕಷ್ಟೇ.

   ಹಾಲಿನ ಫ್ಯಾಕ್ಟರಿಗಳಲ್ಲೂ ಭ್ರಷ್ಟಾಚಾರ ಕಮ್ಮಿ ಇಲ್ಲ. ಹಾಲು ಉತ್ಪಾದಕರ ಹಾಲನ್ನು ಸ್ವೀಕರಿಸಿ ಆಮೇಲೆ ಅದರಲ್ಲಿ ನಿಗದಿ ಪಡಿಸಿರುವಷ್ಟು ಫ್ಯಾಟ್ ಇಲ್ಲ ಅಂತ  ಹೇಳಿ ಹಣವನ್ನು ಕೊಡುವುದಿಲ್ಲ. ಆದರೆ ಹಾಲನ್ನು ಬಳಸುತ್ತಾರೆ. ಒಮ್ಮೆ ಯೋಚ್ನೆ ಮಾಡಿ 600 ಲೀಟರ್ ಅನ್ನು ಬೇಡ ಅಂತ ಹೇಳಿ ಹಣ ಕೊಟ್ಟಿಲ್ಲ ಅಂದರೆ ಅವರಿಗೆ ಆಗುವ ನಷ್ಟ ಎಷ್ಟು??!!!

 
       ಗೋವಿಗೆ ಪ್ರಾಚೀನ ಹಿಂದೂ ಧರ್ಮದಲ್ಲಿ ಪೂಜ್ಯ ಸ್ಥಾನವನ್ನು ಕಲ್ಪಿಸಿದ್ದಾರೆ. ಏಕೆಂದರೆ ಅದು ಎಷ್ಟು ಪ್ರೌಯೋಜನಕರವಾದರು ಅದು ನಮ್ಮಿಂದ ಏನು ಕೇಳುವುದಿಲ್ಲ. ಮೊದಲೇ ಹೇಳಿದಂತೆ ಸಾಧುಪ್ರಾಣಿ.

 
    ದೇಶದಲ್ಲಿ  ಅಕ್ರಮ ಕಸಾಯಿಖಾನೆ ನಿರ್ಮೂಲನೆ ಆದರೆ ಮಾತ್ರ ಸಾಕಾಗುವುದಿಲ್ಲ. ರಸ್ತೆಯಲ್ಲಿ ನಾವು ಎಷ್ಟೋ ಪ್ಲಾಸ್ಟಿಕ್ ವಸ್ತುಗಳನ್ನು ಬಿಸಾಡ್ತೀವಿ. ಅದನ್ನು ನಾವು ನಿಲ್ಲಿಸಬೇಕು. ಅವನ್ನೇ ಗೋವುಗಳು ತಿನ್ನೋದು ಅದಾದಮೇಲೆ ಸಾಯುವುದು. ನಾವು ಸಿಕ್ಕಿದೆಲ್ಲ ರಸ್ತೆಗೆ ಹಾಕದೆ ಹೋದರೆ ದೇಶವು ಸ್ವಚ್ಛವಾಗಿ ಇರುತ್ತದೆ. ಇನ್ನೊಂದು ಕಡೆಯಲ್ಲಿ ಗೋವುಗಳು ಆ ಕಸವನ್ನು ತಿನ್ನುವುದಿಲ್ಲ.

       ಏನೇ ಆಗಲಿ ಗೋವು ಒಂದೇ ಅಲ್ಲ, ಎಲ್ಲಾ ಪ್ರಾಣಿಗಳನ್ನು ರಕ್ಷಿಸೋಣ, ಪರಿಸರವನ್ನು ರಕ್ಷಿಸೋಣ.
ಪರಿಸರವಿದ್ದರೆ ನಾವು , ನಾವಿದ್ದರೆ ಪರಿಸರವಲ್ಲ.